ٹریا جاواں چپ چپیتا

ٹریا جاواں چپ چپیتا ۔
گلاں کردا اپنے نال ۔
نالے ویکھاں قدرت ربّ دی ۔
نالے سوچاں لنگیا سال ۔

حساب کتاب دے سارے چُنگل ۔
سر وچ آن وڑے سی میرے ۔
کی لبیا کی ٹُر گیا میرا ۔
سوچاں دا اک لماں جال ۔

ناشکری دا کیڑا مینو ۔
اندرو اندری کھائی جاوے ۔
رب نو نالے واجاں ماراں ۔
کیوں کیتا انج میرے نال۔ ؟

اینے وچ اک بابا لنگیا ۔
انج لگیا کہ میں ہی لنگیا ۔
پھٹے کپڑے ٹٹی جتی ۔
ماڑی حالت کِھلرے وال ۔

اکھاں وچ تماکے ہوگئے ۔
سارے دکھ اک پاسے ہوگئے ۔
ٹُریا جاواں پچھے پچھے ۔
کِیویں پُچھدا اودا حال ۔

ربّ تو فیر نموشی آوے ۔
اپنے آپ چوں بَو جئی آوے ۔
سکندر دے وی ہتھ سی خالی۔
نال سی لے گیا کیڑا مال ۔ ؟

ٹریا جاواں چپ چپیتا ۔
گلاں کردا اپنے نال