عاصمہ جہانگیر کی وفات پر اخلاق کے بھاشن

..ابوبکر قدوسی
ہم نہیں  کہتے کہ آپ پھلجھڑیاں اور پٹاخے چھوڑنے شروع کر دیں – اور ایسا بھی نہیں کہ کوئی ان کو مغفور اور کوئی ان کے ایمان کا بھرا ہوا کاسہ لیے چلا آ رہا ہے –
ہم عام لوگ ہیں اور انسانوں کے ظاہر کے مکلف اور اس پر فیصلہ کرنے پر مجبور –
ہم بہت بھلکڑ ہیں ، کل کی بات بھول جاتے ہیں کوئی اسلام کے ساتھ کیا ہی کھلواڑ کرے ، مذھب کی کیسی بھی توہین کرے سب بھول جاتے ہیں اور اخلاقیات کے بهاشن دینا شروع کر دیتے ہیں – اس کے لیے اللہ کے رسول کا اسوہ بھی ڈھونڈ نکالتے ہیں – لیکن جب یہی معاملہ اپنی ذات کا آتا ہے تو مرے ہوئے کی پچھلی سات نسلوں کو بھی معاف نہیں کر پاتے –
آئیے لاہور چلتے ہیں سن شاید پچاسی ہو گا – لاہور ہائی کورٹ کے دروازے پر علامہ احسان الہی ظہیر چلے آ رہے تھے – نوجوان بلکہ اٹھتی جوانی کی ایک وکیل بہت جذباتی ہو کر ان کی طرف بڑھی – دونوں میں ایک نکتہ اشتراک تھا کہ دونوں ضیاء الحق کے شدید ترین ناقد – نوجوان وکیل کا نام عاصمہ جیلانی تھا – جی یہی جو اب جہانگیر ہویں – ان دنوں ضیاء کے قوانین کا شور تھا – پوچھنے لگی کہ علامہ صاحب عورت کی گواہی کتنی ہے – علامہ نے طرح دی اور نکلنا چاہا لیکن خاتون ٹلنے اور ٹالنے کے موڈ میں نہ تھیں – علامہ بولے کہ بی بی سن لو عورت کی گواہی آدھی ہے – موصوفہ تڑپ اٹھیں اور علامہ کے لتے لینے لگیں –  ہذیانی کیفیت طاری ہو گئی اور یہی ہذیان پھر  عمر بهر مقدر رہا –
جنم جنم کا ساتهی ہوا- بے اختیار ہو کر نعرے لگانے لگیں کہ مولوی کی داڑھی آدھی ، مولوی آدھا ، عورت کیوں آدھی …غرض جو منہ میں  آیا کہا –
ضیاء دور تھا ، اسلامی نظام کا غوغا تھا ، نفاذ کیا ہونا تھا مذاق ضرور بن گیا – لیکن اس  قبیل کو یہ مذاق بھی گوارہ نہ تھا – ایک روز نبی کریم کے بارے میں ہرزہ سرائی کی – ہم جس ” نبی امی ” لفظ پر فخر کرتے ہیں موصوفہ نے اس “امی ” کو ان پڑھ کہہ کے  بطور استہزاء  بیان کیا ، اور نبی کریم کی کهلی توہین کی – اسی کے رد عمل میں آپا نثار فاطمہ نے اسمبلی میں تحریک پیش کی جو موجودہ قانون توہین رسالت پر منتج ہوئی – اب کسی کو سمجھ آیا کہ موصوفہ کو اس قانون سے “الرجی ” کیوں ہے ؟

کوی ایک قصہ ہو تو کہیں ؟
انسانی حقوق کی پرچارک تھیں ، لیکن اجڑتے گھروں کو “دستک ”   میں مزید اجاڑا جاتا ، کس کو ارشد کیس یاد نہیں کہ کس طرح موصوفہ نے مذھب دشمنی میں ہر طرح کی اخلاقیات کو بھلا دیا ، کس طرح محض مولوی کی بدنامی کی خاطر ایک خاندان  کو ذلیل و رسوا کیا گیا –
انسانی حقوق کا ڈھونگ تو ان دنوں ہی بیچ چوراہے پھوٹ گیا جب لال مسجد کا واقعہ ہوا تھا – ان کی پاکستانیت کا تو سب کو معلوم ہے جس طرح فوج پر تنقید کرتیں ، آج اس کو لے کر ، اس لہجے کو یاد کر کے ایک صاحب کہہ رہے تھے کہ مرد عورت تھی مرد – ہمارا سوال یہ ہے کہ جناب پنجاب میں  ہزاروں معصوم مذہبی کارکن قتل کئے گئے اور  ناجائز قتل کیے گئے کس روز  ” محترمہ ” کو حریت فکر یاد آئی ، لیکن جب بھی  بلوچ افراد کی گمشدگی کے معاملات سامنے آئے ، الاللہ کر کے فوج کے لتے لینا شروع کر دیتیں – اس کے لیے ان کو حب الوطنی کے تقاضے بھی بھول جاتے – یہ کیسے انسانی حقوق کی پٹاری تھی کہ جو بندے کی شکل اور مذھب دیکھ کے کھلتی تھی –
یہ  کہنا کہ پس مرگ کسی کو برا کیا کہنا –  سونے جیسی بات لیکن ہم کسی کو یوں ہیرو بھی نہیں بنانے دیں گے – موصوفہ مولوی دشمن نہ تھیں بلکہ مذھب سے نفرت کرتی تھیں – فوج دشمن نہ تھیں بلکہ فوج سے نفرت کرتی تھیں – ہم ان  کے ذاتی معاملات پر بات نہیں کرتے لیکن یہ کیا کہ موت کے سبب ان کے نظریات کو بھی بھلا دیا جائے –
ہمیں اپنی اولادوں سے زیادہ عزیز ہستی اللہ کے رسول کی ہے ، خاتون کی تمام تر زندگی آپ کی حرمت کے قانون کے خلاف  جدوجہد میں گزری ،  اور اس کی تنسیخ کی کوشش میں گزری ، ان کی جہد مسلسل کا نکتہ  ہی یہ تھا کہ اگر کوئی نبی کی ذات پر طنز کرتا ہے تو یہ آزادی اظہار ہے – اور اسی سبب انہوں نے نبی کریم کی توہین اور استہزاء تک کر چھوڑا تھا –
اور ابھی صرف ایک  ہفتہ پہلے موصوفہ نے ٹویٹ کی جس میں قصور کی زینب کے قاتل کو سزائے موت دینے کی مخالفت کی اور اس کی جہالت قرار دیا – ضیاء الحق کے دور سے اس قانون کو جوڑا ، حالانکہ سب جانتے ہیں کہ سزائے  موت کا قانون اسلامی ہے نہ کہ ضیاء الحقی …لیکن ضیاء کی آڑ میں موصوفہ پچھلے ہفتے بھی اسلامی سزاؤں کے خلاف بولی تھیں –
متنبی کا شعر ہے ترجمہ پڑھ لیجئے کہ :
جو ہمارے ساتھ مہذب ہے ہم سے بڑھ کے کوئی تھذیب یافتہ نہیں ، لیکن اگر کوئی ہم سے جہالت کا مظاہرہ کرتا ہے تو ہم سے بڑھ کے کوئی جاہل نہیں – سو اس جہالت کہ توہین رسالت کا قانون ایک دقیانوسی قانون ہے …ہم جاہل ہی بھلے ، کوئی ہمیں اخلاق کے بھاشن نہ دے

[facebook][tweet][digg][stumble][Google][pinterest]